blog.Tiaan.com   Weblog van Tiaan Geldenhuys (Afrikaans)

Het jy geweet dat daar maar net 14 verskillende kalenders vir enige jaar ooit is? Dis nou as mens kyk na die dae van die week waarop enige dag van die jaar sal val en die algemene moderne Westerse kalender gebruik (die sogenaamde Gregoriaanse een). Byvoorbeeld, ’n almanak van 2009 sal weer oor ses jaar, in 2015, herbenut kan word — natuurlik kan sommige vakansiedae en ander goed wat iets met die maan te doen het wel verskil (soos veral rondom paasnaweek en byvoorbeeld volmaan en halfmaan, wat in elk geval van plek tot plek op die aarde kan verskil). Maar vir 2009 en 2015, net soos vir die jaar 1998 of 2026, sal Januarie op ’n Donderdag begin, Februarie sal weer net 28 dae hê sodat beide Februarie en Maart op Sondae begin, en jy sal ook op dieselfde weeksdag verjaar. Net so lyk 2010 se kalender dieselfde as in 1999 of 2021. (Meer besonderhede in die tabel.)

Aangesien woorde in Afrikaans gereeld gebruik maak van letters met aksente, deeltekens, kappies en so meer (d.w.s. met diakritiese tekens), en omdat heelwat rekenaars nie sleutelborde het waarop hierdie letters voorkom nie, kan die tik van Afrikaans soms ’n beslommernis wees. Daar bestaan egter ’n tegniek wat mens vir hierdie spesiale karakters kan gebruik op meeste rekenaars waarop Microsoft Windows bedryfstelsels hardloop, boonop sonder enige verdere sagteware of konfigurasie. Die tegniek maak gebruik van karakter nommers (ook bekend as karakter kodes) wat mens intik op die numeriese toetsbordjie terwyl mens die Alt knoppie ook inhou (d.w.s. mens gebruik die regterkantse deel van die sleutelbord wat soos ’n sakrekenaar lyk, met NumLock ook aangeskakel, en tik die nommers met jou regterhand daarop in terwyl jou linkerhand een van die Alt knoppies inhou). Sodra mens die kode klaar ingetik het en daarna die Alt knoppie weer laat los, sal die ooreenstemmende karakter van hierdie Alt-kode verskyn in die program waarin jy werk. Die besonderhede van die kodes word hieronder verder bespreek.

’n Ruk terug het ek vertel hoe enige Vodacom gebruiker vanaf sy of haar selfoon ’n epos kan stuur (lees hierdie vorige berig vir besonderhede). Soortgelyke funksionaliteit is ook vir MTN selfoon gebruikers in Suid-Afrika beskikbaar. Dit wil egter voorkom of mens slegs die SMS metode kan gebruik en dat daar nie ’n MMS ekwivalent op die MTN netwerk beskikbaar is nie (in teenstelling met Vodacom se MMS diens wat mens ook in staat stel om foto’s by die epos in te sluit). Nietemin bied MTN darem die basiese SMS2Email diens waarmee jy ’n SMS kan intik en dit dan na iemand se epos adres kan stuur. Hier volg hoe jy dit kan doen...

As deel van die opknapping van Tiaan.com is die aanlyn speltoetser ook opgedateer, soos uitgebeeld in hierdie vóór en ná skerm skote, en hieronder verder beskryf word.

Vandag breek ’n nuwe hoofstuk vir Tiaan.com aan met die vrystelling van ’n opgegradeerde webwerf en ’n hernude begin vir 2009. Die veranderinge is meestal tegnies van aard en sluit argitekturale herstrukturering in om toekomstige opdaterings makliker te maak, maar die noemenswaardige sigbare veranderinge is soos volg.

Het jy geweet, as jy ’n Vodacom selfoon gebruiker in Suid-Afrika is kan jy ook ’n epos na iemand vanaf jou foon stuur? Hierdie is veral handig vir persone wat nie maklik toegang tot die Internet het nie maar tog met familie of vriende wat epos kan ontvang wil kommunikeer. Daar is twee maniere wat ek hier bespreek om ’n epos vanaf jou Vodacom selfoon te stuur, naamlik deur van die SMS of MMS metodes gebruik te maak. Selfs ouer fone sal die SMS metode kan gebruik, maar as jy ’n nuwer sellulêre telefoon het wat ook MMS boodskappe kan stuur sal jy selfs foto’s saam met jou teks boodskap na iemand kan epos.

Dit mag dalk al ou nuus vir sommiges wees, maar ek het nou gelukkig toestemming¹ van die Beeld koerant gekry om hierdie berig (ook verkrygbaar deur die Media24 Argief) op my webwerf te mag gebruik. Ja, dis reg, in die Beeld koerant van Woensdag 17 Augustus 2005, op die voorblad van die “Snuffelgids: Beroepe” bylaag, het Heléne Cilliers 'n berig geskryf wat handel oor my Afrikaanse speltoetser op die Internet. Vir diegene wat die artikel nog nie onder oë gehad het nie, lees dit gerus hieronder (of in die oorspronklike formaat deur op die kleinskets van die skansie weergawe te kliek).

Een van die vrae wat die meeste opduik sedertdien ek my aanlyn speltoetser vrygestel het, is hoe om die sagteware te bekom sodat dit aflyn gebruik kan word. Alhoewel die aanlyn speltoetser nie vir hierdie doel ontwerp was nie, laat die Afrikaanse woordeboek wat agter die speltoetser sit dit tog toe. Nou dat ek uitgepluis het hoe om dit te doen, het ek besluit om hierdie proses te dokumenteer. Dit sal mens dan in staat stel om beide die aanlyn en aflyn speltoetsers te gebruik, afhangend van die behoeftes vir 'n spesifieke situasie.

Uiteindelik is ek klaar met hierdie speltoetser sodat dit op my webwerf beskikbaar gestel kan word. Hierdie was die eerste klein projekkie wat ek gedefinieer het om my persoonlike webwerf te begin en ek dink dit het op die ou einde lekker uitgewerk. Vir 'n wyle sal hierdie basies die enigste funksionaliteit wees wat publiek op hierdie werf beskikbaar sal wees, maar daar is heelwat ander idees wat mettertyd behoort te materialiseer soos wat hierdie webwerf groei (as ek tyd daarvoor kan maak).

Die groot dryf agter hierdie strewe was om 'n aanlyn speltoetser vir Afrikaans daar te stel. Alhoewel speltoetsers vir Engels geredelik beskikbaar is in teks redigering sagteware kan 'n mens nie dieselfde vir Afrikaans sê nie (wat ook 'n probleem is vir meeste ander tale wat op hierdie planeet gebruik word). En so is die Afrikaanse speltoetser gebore, en as 'n ekstra pasella het die Engelse speltoetser ook sommer met min addisionele moeite bygekom.