Herhaling van Jaarlikse Kalenders

Hergebruik van kalenders vir verskillende jare.Het jy geweet dat daar maar net 14 verskillende kalenders vir enige jaar ooit is? Dis nou as mens kyk na die dae van die week waarop enige dag van die jaar sal val en die algemene moderne Westerse kalender gebruik (die sogenaamde Gregoriaanse een). Byvoorbeeld, ’n almanak van 2009 sal weer oor ses jaar, in 2015, herbenut kan word — natuurlik kan sommige vakansiedae en ander goed wat iets met die maan te doen het wel verskil (soos veral rondom paasnaweek en byvoorbeeld volmaan en halfmaan, wat in elk geval van plek tot plek op die aarde kan verskil). Maar vir 2009 en 2015, net soos vir die jaar 1998 of 2026, sal Januarie op ’n Donderdag begin, Februarie sal weer net 28 dae hê sodat beide Februarie en Maart op Sondae begin, en jy sal ook op dieselfde weeksdag verjaar. Net so lyk 2010 se kalender dieselfde as in 1999 of 2021.

Die rede waarom daar veertien kalenders in totaal is, is dat dit die kombinasie van die sewe dae van ’n week saam met die twee moontlikhede van ’n skrikkeljaar of gewone jaar is: dus, sewe maal twee. Dis die maklike deel om uit te pluis, maar dis bietjie moeiliker om te weet presies watter jare dieselfde kalenders gebruik. Dit is egter waar die onderstaande tabel inkom waarin ’n klompie onlangse en toekomstige jare gelys word. Die 14 kalenders word aangedui met die alfabetiese letters A tot N, een vir elk van die rye in die tabel.

# Kalender Jare
A 1970 1981 1987 1998 2009 2015 2026 2037 2043 2054
B 1974 1985 1991 2002 2013 2019 2030 2041 2047 2058
C 1979 1990 2001 2007 2018 2029 2035 2046 2057 2063
D 1971 1982 1993 1999 2010 2021 2027 2038 2049 2055
E 1977 1983 1994 2005 2011 2022 2033 2039 2050 2061
F 1978 1989 1995 2006 2017 2023 2034 2045 2051 2062
G 1975 1986 1997 2003 2014 2025 2031 2042 2053 2059
H 1888 1928 1956 1984 2012 2040 2068 2096 2108 2136
I 1904 1932 1960 1988 2016 2044 2072 2112 2140 2168
J 1924 1952 1980 2008 2036 2064 2092 2104 2132 2160
K 1908 1936 1964 1992 2020 2048 2076 2116 2144 2172
L 1920 1948 1976 2004 2032 2060 2088 2128 2156 2184
M 1912 1940 1968 1996 2024 2052 2080 2120 2148 2176
N 1916 1944 1972 2000 2028 2056 2084 2124 2152 2180

Vir die jaar 2009 word kalender A gebruik (d.w.s. die eerste ry), wat toevallig een van die twee kalenders is wat die meeste voorkom: beide kalenders A en B word gemiddeld omtrent een keer elke 9.1 jaar gebruik — of meer presies, 44 keer elke 400 jaar (waarna die patroon weer van voor af begin). Soortgelyk word kalenders C tot G die tweede meeste gebruik (naamlik gemiddeld een keer elke 9.3 jaar), kalenders H en I heelwat minder met ’n gemiddelde interval van 26.7 jaar, kalenders J en K elke 28.6 jaar, en kalenders L tot N word die minste gebruik (gemiddeld slegs een keer omtrent elke 30.8 jaar; dis slegs 13 keer elke 400 jaar). Die kortste tyd tussen die hergebruik van ’n spesifieke kalender is ses jaar (soos byvoorbeeld vir kalender A tussen 2009 en 2015) en die langste wagtyd kan tot 40 jaar wees (soos byvoorbeeld vir kalender I tussen 2072 en 2112).

So, dink twee keer voordat jy jou gunsteling kalender weggooi aan die einde van die jaar. Of dalk het jy gedink jy sal nooit daardie ou kalender kan gebruik wat jy present gekry het maar toe vergeet het om op te hang te nie, maar nou weet jy van beter. Aan die ander kant, die oorhoofse gemiddelde wagtyd vir al die kalenders werk uit op ook 14 jaar oor die lang duur, wat dalk bietjie lank is in vergelyking met die tempo waarteen party mense se smaak verander. Maar miskien, nou dat jy weet jaarlikse kalenders kan meer as een keer gebruik word of dalk weer daaraan herinner is, kan jy sommer self ’n klompie mooi tydlose en herbruikbare almanakke maak.

Kommentare

Formule

Het jou artikel oor die kalender gelees. Was gekukkig om 'n formule uit te werk wat help om te bepaal op watter dag 'n spesifieke datum val. Volgens die formule herhaal elke kalender homself op 'n spesifieke patroon nl. na 6 jaar, dan 5 jaar dan weer 6 jaar, dan 11 jaar en begin dan weer met 6, 5, 6, 11 ens. Hoop my formuletjie is reg. Laat weet maar of dit klop met jou feite. Interessant dankie. Groete. Frik Grobler

Re: Formule

Hallo Frik: Ek sal in meer besonderhede moet kyk na die formule om verseker vir jou 'n antwoord te kan gee, maar so op eerste oogopslag klink dit of daar waarskynlik nog 'n foutjie in jou formule mag wees. Die volledige patroon herhaal eers na 400 jaar. Alhoewel dit mag voorkom of mens patrone waarneem wanneer mens slegs na korter periodes kyk, is dit nie heeltemal so eenvoudig nie. Ek is bly om te hoor jy het die artikel ook interessant gevind. Groete, Tiaan.

Kalender datum

Op watter dag sal 1 Januarie 2021 wees?

Re: Kalender datum

Vir 2021 word kalender D gebruik waar al die dae op dieselfde weeksdae as vir byvoorbeeld 1999, 2010, 2027 of 2038 val. Vir al daardie jare val 1 Januarie op 'n Vrydag en verloop die res van die dae vir daardie jare presies dieselfde.